Inyubako ziherereye ahagiye gukorerwa ibikorwa byo kwagura umuhanda wa Prince House – Giporoso – Masaka, zatangiye gusenywa kugira ngo imirimo itangire.
Ugeze kuri Prince House, ugakomeza hafi y’ahari KFC, werekeza mu Giporoso, ubona inyubako ziri gusenywa yaba haruguru y’umuhanda no hepfo y’umuhanda ahazwi nko kuri Come Again.
Umuyobozi Nshingwabikorwa w’Akarere ka Kicukiro, Mutsinzi Antoine, yabwiye Itangazamauru ko imirimo yo gusenya imwe mu mitungo y’abaturage bahawe ingurane yatangiye.
Ati “Imirimo yatangiye. Hari abaturage bishyuwe twatangiye gukuraho imitungo yabo, kuko muri Kicukiro dufite imitungo igera kuri 72 y’abishyuwe yatangiye gukurwaho.”
Imirimo yo kwagura uyu muhanda izafata igice kinini mu Mirenge ya Kanombe na Nyarugunga kuko bizahera mu Giporoso bikagera ku Mulindi.
Ibikorwa byo kwagura uyu muhanda bizarangira bitwaye arenga miliyari 86 Frw. Niwuzura, uzaba ufite ibice bine, bibiri ku ruhande rumwe n’ibindi ku rundi, aho byitezwe ko uzagira uruhare mu kugabanya umuvundo w’ibinyabiziga ugaragara mu bice bya Giporoso, Kanombe na Masaka.
